Paroles: Canta U Populu Corsu. L'alta Strada.

La mio culomba messaghjera
Chi parte per longu viaghju
Traversa la Corsica intera
Cu lu zitellu e lu capraghju.

Salutami l'Omu di Cagna
E l'Ospedale cun Bavella
Di lu Cuscionu la muntagna
Incu l'Alcudina per stella.

Stende lu volu maestosu
Cala u to sguardu in pianu d'Ese
Ci so li Pozzi e lu Renosu
Ti faranu cullane appese.

Franca l'Oriente e Monte d'Oru
Da Manganellu a la Maniccia
Cu li lavi di lu Ritondu
Guarda lu Cardu e Lattiniccia.

Acqua Ciarnente e Camputile
Da Ninu a Verghju per la furesta
He bella la neve d'aprile
Quandu u sole si mette in festa.

O Paglia Orba luminosa
Regina bianca incurunata
Damicella cusi pumposa
Di lu Cintu s'he innamurata.

Cantanu inseme cun amore
Cu l'altre cime di lu circondu
U silenziu fattu rimore
Per la bellezza di lu mio mondu